جاء ابني الي المطبخ و انا احضر طعام الغداء و جلس علي احد المقاعد و طبعا انا بافهمه من عينيه
و قال بصوته الجميل ( ماما لو قلت ليكي حاجه هاتزعلي ؟ )
أنا : طبعا لا يا حبيببي هازعل ليه
هو :طيب يا ماما ايه رأيك في الحب ؟
أنا : ( جوا نفسي اولا اهلا و سهلا) الحب يا حبيبي شي جميل و شعور طبيعي
هو: يعني مش معترضه
أنا : مش معترضه علي ايه مش لما افهم الاول هو انت بتحب حد
طبعا لو قلت ايه الكلام ده و لسه بدري هايمشي و يسيبني و هايخبي عليا
هو: لا مش انا اللي بأحب بس زمايلي فلان و فلان بيحبوا فلانه و فلانه و منهم اتنين اقارب اصلا
أنا : طيب لكن لما حبوهم عملوا ليهم ايه ؟
هو : هايعملوا ليهم ايه يعني ؟
أنا: يعني مثال لو واحدة من الحبيبات الصغيرات دول حصل ليها مشكله او محتاجه حاجه صاحبك هايعمل ايه ؟
هو: مش هايعمل حاجه طبعا لانه صغير
أنا : طيب يعني هو هايقول باحبك بس كدة و لو هي مش معاها فلوس تكمل مدرسه هو مش هايدفع و لو هي مريضه مش هايقف جنبها و لو هي حد ضايقها مش هاواسيها
هو : ( نوبه من الضحك ) لا طبعا
أنا : يبقي حب ايه ده يا حبيبي الحب مش كلمه بس الحب فعل انا باحبك قوي انا باعمل كل حاجه علشاتك لو حد زعلك انا جنبك و لو انت محتاج حاجه انا معاك و دايما بافكر فيك و في راحتك و مستقبلك لان الحب مسئوليه قبل ما يكون كلمه
و اصحابك لسه شعورهم مش مستقر النهاردة البنت دي حلوة بكرة دي احلي انت بقي اخبارك ايه ؟
هو: لا انا باحب الشعور بس مش اكثر
أنا : طيب بس وعد لما يحصل ان الشعور زاد شويه تبقي تقولي
هو : اكيد يا مام اعملي عصير ليمون بقي
ااقول ايه ؟ انا لو شخطت فيه مش هايقولي تاني اي حاجه يا رب صبرني يا تري انا اتصرفت صح و لا غلط
معنديش أطفال علشان أقدر أحكم صح لكن من خلال شغلى أجمل شئ هو الصداقة بين الأم وأولادها كده كده هيعمل اللى عاوزه سواء وافقنا أو رفضنا لأنه لازم يقتنع بالأسباب بس الأجمل من إنك صاحبتيه إنك كمان لفتى نظره لمعنى الحب يعنى ربتيه
ReplyDeleteربنا يعينك عليه الولاد فى منتهى الذكاء
السنونو
ReplyDeleteاهلا بك
لازم نحاول مع اولادنا و نكون صبورين جدا لان العصر ده صعب و ان كان ليا وجهه نظر في تربيه بعض الامهات حاليا
تحياتي
جميل ... جدا:)
ReplyDeleteانت فهمتيه ان القيمه هى الفلوس
ReplyDeleteوده غلط جداا
ممكن تقولى له ان لو البنت زعلانه ممكن لو قلتيلها كلمه حلوه تفرحها
الفلوس لا تصنع سعاده .....صدقينى
بصى لهشام طلعت
السعاده تعنى الرضا
بأى شيىء
مياسي
ReplyDeleteاهلا بيكي و شكرا لك
تحياتي
solly 88
ReplyDeleteلا انا مش فهمته ان الفلوس هي السعادة طيب كمل بقيت السطر انها لو مريضه او عندها مشكله يقدر يحلها ازاي
الانفاق نوع من المسئوليه و نوع من الحب لما تكون بنحب حد بيكون همك توفر ليه اللي يريحه
كان كل غرضي ان هو مش قد المسئوليه و مش مفروض يرمي كلمه هو مش قدها
و بعدين ابني اكيد اكيد مش هايكون زي طلعت مصطفي في اسلوب حياته لان مهما كان احنا لسه عندنا قيم و اخلاق
تحياتي