Peace ya man

مصطلح جديد سمعته من ابني الحبيب و هو بيكلم صديقه في التليفون

مفردات لغويه غريبة نصها عربي و نصها انجليزي

ناديت قطعة القمر و سألته انجليزيتك اكثر من رائعه و لغتك العربية مثل اسنان الرجل العجوز

لما لا تتحدث بالانجليزيه دائما أو تحاول تحسين اللغه العربية

ضحك القمر و قال يا ماما خليكي كول دة اللغه الجديدة احنا بنفهم بعض و دي لغة عصرنا

لما راي الدهشة رد الجميل و قال

افلام زمان بيقول يا نينه و سعيدة مبارك انت مش بتقولي كدة

قلت ايوة بس المفردات اتطورت من العربي للعربي برضه مش فرانكو اراب

قال الجميل : يا ما ما فاكس بقي كله بيتغير

فاكس ايه ابعت فاكس لمين يا حبي ؟ احنا بنستخدم الايميل

ضحك بشدة علي كلامي قالي فاكس يعني طنشي بقي فتحت بقي قوي

حاسه اني مش من العصر دة ... حضني القمر و قال تدفعي كام و اعطيكي درس

عاوزة القاموس الجديد حد يقولي اشتريه منييييييييييييييييييييين؟؟؟؟؟؟؟؟؟

سفر

ولدي الحبييب

منذ سفرك و انا اشتاقك احتضن و سادتك كل ليلة و اتذكر كل حياتك

اتلو كلماتك الواحدة تلو الاخري و اضحك و ابكي

ما يفرح قلبي انك الحمد لله بخير و تستمتع بوقت طيب

تجرب أشياء جديدة و تبني ذكرياتك الخاصة

و مع ذلك مازلت اشتاق اليك و لاضمك لصدري و اسمع صوتك في اذني

اوحشني وجهك و انت نائم في سريرك مثل الملاك و قبلاتي لك مساءا

ولدي الحبيب كل شئ هنا يناديك و يشتاقك حتي و ان لم تشتاقه انت

ماما

الكتكوت طلع من البيضة

جاء ابني الي المطبخ و انا احضر طعام الغداء و جلس علي احد المقاعد و طبعا انا بافهمه من عينيه 

و قال بصوته الجميل ( ماما لو قلت ليكي حاجه هاتزعلي ؟ )  

أنا : طبعا لا يا حبيببي هازعل ليه 

هو :طيب يا ماما ايه رأيك في الحب ؟

 أنا : ( جوا نفسي اولا اهلا و سهلا) الحب يا حبيبي شي جميل و شعور طبيعي

هو: يعني مش معترضه 

أنا : مش معترضه علي ايه مش لما افهم الاول هو انت بتحب حد 

طبعا لو قلت ايه الكلام ده و لسه بدري هايمشي و يسيبني و هايخبي عليا

هو: لا مش انا اللي بأحب بس زمايلي فلان و فلان بيحبوا فلانه و فلانه و منهم اتنين اقارب اصلا

أنا : طيب لكن لما حبوهم عملوا ليهم ايه ؟

هو : هايعملوا ليهم ايه يعني ؟

أنا: يعني مثال لو واحدة من الحبيبات الصغيرات دول حصل ليها مشكله او محتاجه حاجه صاحبك هايعمل ايه ؟

هو: مش هايعمل حاجه طبعا لانه صغير

أنا : طيب يعني هو هايقول باحبك بس كدة و لو هي مش معاها فلوس تكمل مدرسه هو مش هايدفع و لو هي مريضه مش هايقف جنبها و لو هي حد ضايقها مش هاواسيها

هو : ( نوبه من الضحك ) لا طبعا 

أنا : يبقي حب ايه ده يا حبيبي الحب مش كلمه بس الحب فعل انا باحبك قوي انا باعمل كل حاجه علشاتك لو حد زعلك انا جنبك و لو انت محتاج حاجه انا معاك و دايما بافكر فيك و في راحتك و مستقبلك لان الحب مسئوليه قبل ما يكون كلمه

و اصحابك لسه شعورهم مش مستقر النهاردة البنت دي حلوة بكرة دي احلي انت بقي اخبارك ايه ؟

هو: لا انا باحب الشعور بس مش اكثر 

أنا : طيب بس وعد لما يحصل ان الشعور زاد شويه تبقي تقولي 

هو : اكيد يا مام اعملي عصير ليمون بقي

ااقول ايه ؟ انا لو شخطت فيه مش هايقولي تاني اي  حاجه يا رب صبرني يا تري انا اتصرفت صح و لا غلط 

My sweet son

I love you so much

God Bless You

الفيس بوك

شباب هذا الجيل مغرم جدا بالكمبيوتر هو صاحبه الاول و الاخير

علي الكمبيوتر و برامجه بيكلم أصحابه و اهله لو بعيد عنه

و بيعمل حاجات يمكن تكون خفيه احنا مش شايفينها

بدأ موضوع الكمبيوتر الاول زي الاتاري بالظبط وده في مرحله الكي جي

شويه و بدأنا الألعاب اون لاين و تنزيل و تحميل احدث الألعاب

و ممكن الجهاز يهنج و يعيط و يقول ارحموني من كثرة الألعاب و الفيروسات

و ماما تشيل الجهاز و تجري تصلح ( بصراحه ظهري اتكسر من الشيل و الحط

أخيرا كبرنا شويه و بدأنا نتعلم برامج منها شات و منها جرافيك و بصراحه هو ممتاز

في برامج الجرافيك و بيعمل شغل كويس و ده خلاني افكر انمي الموهبه دي و ياخد دبلوما جرافيك

السنه دي بقي الخناقه كانت علي لعبه اسمها تيبيا و كونكر و حاجات كتير لاني لاحظت انها بتاكل راسه

يعني نخلص مذاكرة بسرعه و ناكل بسرعه و ساعات و احنا بنلعب و يا صباح التلزيق

اخيرا مسكت عليه حاجه في شهر كانت درجاته ناقصه كتير و يالا يا جميل امسح اللعبه بايدك

و بلاش لؤم و تعمل كوبي منها علي هارد تاني و تم المراد

بس مراد مين و شاديه مين هما يومين ادب و طلعلي الفيس بوك

بيكلم اصحابه و صاحباته و لا قيت بنات الصف السادس كلهم علي الفيس بوك ودي سوسو و دي توتو

و كمان بينزل اغاني حفل التخرج و عاوز ينزل الحفله نفسها

و لاقيت صور كتيييييير قوي بتاعته مضافه في الالبوم يعني انا اهرب من الالعاب الاقي الفيس بوك

الامتحانات قربت أأأأأأأهههههههههه

حالة الامتحانات

  حان وقت الاستعداد للامتحانات و التركيز 

حاله غريبه تنتاب ابني في هذا الوقت رغم تفوقه

عدم الرغبه في الاستذكار و الرغبه في عمل اي شئ يدوي مثل الرسم و الشغل بالاوراق الملونه و الخيوط

مع انها موجودة طوال العام و لكن دون ان يفكر في استخدامها و اكتشفت انه ليس الوحيد البعض يحن لالعابه القديمه 

و الشئ الجديد هذا العام الفرق الموسيقيه الاجنبيه و تنزيل برامج و احدث الاغنيات للمدعو 

Eminem & High school music

صوتي بدأ يوصل للجيران يا رب رحمتك ارجووووووووك محتاجين مجموع السنه دي 

ربنا يستر 

البداية

نبتدي منين الحكاية ؟

الصغير صار الان مراهقا او بمعني اصبح في بدايات سن المراهقة

سن متعب و متقلب .. الله يعيني علي تقلباته المزاجية

أكيد كلنا مرت علينا بالمرحلة دي

نفتكرها مع بعض

و نشوف فرق الأجيال و الثقافات

طيب البيه مادد بوزو شبرين ههههه فاصل و سأعود